我的感恩見證：被神醫治了！

分享者：敏言

感恩我有這樣一雙手

我有一對不一樣的雙手，一生來就係咁。曾經我好唔中意呢對手，未認識神果時，我經常許願，可以訓醒覺就得到一對同其他人一樣既手。但感謝神，我今日用呢對手可以做司琴，去敬拜神。

被醫治的經歷

第二樣感恩既事，係一個被神醫治既經歷。仲記得五年前，2014年，我剛進大學一年級，大學一年級，因學業壓力問題，我患了情緒病，當時有兩個星期既時間我每晚都喊，控制唔到。正正在18歲生日那天，我壓力爆煲病發，那天，朋友上來我家為我慶祝生日，我摔杯，撕書，打了我最好的朋友一巴掌，係屋企跑黎跑去，不斷話好想要自由，正當我想打開窗跳下去那一刻，牧師和傳道人跟父母按門鈴，原來媽媽咁岩同緊基督徒朋友食飯，當我朋友打比我媽媽，佢即時聯絡到牧師同傳道人黎。他們進來為我祈禱，希望神能進入我的生命，又叫醫生醫治我，因為當時我不願意睇醫生。之後他們叫我跟著他們祈禱，我竟然忘記了主是誰，我問：「主？主耶穌？主耶穌基督？」於是我們一起祈禱，要主進入我生命。

一般人係康復既階段，病情都會好反覆，會冇哂鬥志，但係係我心中，卻一直知道，神係同我一齊，即使係感受上，我係難過既，但我仍然好有信心，因為心中有神，我會捱得過的。還記得，當我因病停學果時，我仍然積極地畫畫，唱詩歌，有時拎起聖經既句子，就求其配音落去彈。因為我心中有耶穌，我仍然有盼望，知道我會支持到。就係咁，我就捱過了那半年情緒高低起伏既康復期。五年來，都冇復發，而且一直減緊藥。

接受自己的經歷

第三樣感恩既事，係我接受自己既經歷。五年前既病，其實係因為我既自信跌到入谷底，我完全睇自己唔順眼，我覺得自己又醜、又笨、又唔識社交，十分唔中意自己。呢種自卑五年來一直都存在。但係就係半年前開始，我認識到雲彩事工，我開始開放我既心，開始好想我既生命比主掌管。係半年前，有一次陳姑同我一齊禱告，係禱告入邊，我好似見到好細個既自己，滿身傷痕。我果時先知道，原來我由好細個開始，我已經好唔中意自己，一直批判自己，於是我求神醫治呢個年輕既小朋友。然後，可能係聖靈既工作，當刻，我真係有一份從未感受過既愛既感覺包圍住我，好安全，好平安，好似我唔需要怕自己係點，因為神都會好中意我。然後，我係禱告中，我好似見到自己好可愛、善良、有愛心既一面，我不得不好愛呢個自己，然後，神又讓我見到自己調皮既一面。係果次之後，我就好中意自己，而且感受到無論如何，神都好愛我，我都係被愛架！

就係三個月前，我仍然有一D好介意自己份人咁簡單，好似會好笨咁，但有一次既禱告中，神話比我聽，神就係要將我陶造成為清心、純真、簡簡單單既我，原來清心既人好有福，原來就係因為我好似小朋友咁樣，我先能夠大大咁得到祝福！就好似一隻杯，如果杯中冇其他水，就可以滿滿咁承住神所傾到既祝福。

趕走惡者的經歷

第四樣感恩既事，係一樣比較恐怖既經歷，趕走惡者既經歷。係三個月前，我訓得好差，訓覺果時動不了，會好凍，成個人震哂，仲有種恐怖既感覺臨到。我什至開始唸，呢排我同神好親近，係咪信主令到我咁。我同陳姑講，陳姑話係惡者既搞擾，係惡者好想我相信是耶穌令到我咁，好使我遠離耶穌（係要我由永生去到永死既里面）。於是佢教我，在我裡面無論有任何抵毀耶穌既說話，我都要奉主既名粉碎。每次，當我裡面有不平安臨到，就奉主既名，叫惡者離開。一開始，我冇咩信心，要講左4次「奉主既名，惡者離開」惡者先走，但漸漸地，我愈黎愈有信心，係經歷兩星期不斷叫佢走，又番黎，再叫再番黎，去到最後一次，我訓晏覺，神好似要專登話比我聽我既信心好足夠咁，當我再一次動不了，我只在心中想一句，「奉主名求，惡者退去」，就即刻動得了，平安回來。感謝主，我靠著耶穌得勝。而係當中，拎到果份，對耶穌係我既拯救和幫助既確信，令我之後面對好多野，我都知道，神會幫助，我不需害怕！耶穌連死亡、惡者都能勝過，我還要懼誰呢？